SULLANA PLI BAUD

L’onn 1916 ha Feiwel – numnà Philipp – Beer fundà sia fabrica da cigarettas a la Badenerstrasse a Turitg. Alura sa numnava ella anc fabrica da cigarettas «Union». Sia paletta da products consistiva da tals nums entusiasmads sco Hera, Péra, Apollon, Stamboul e Byzanz. Ils onns 1920 è la fabrica da cigarettas Beer transferida en la fabrica che stat anc oz al Silquai turitgais. L’onn 1930 è Sullana vegnida sin il martgà sco sorta da cigarettas da la fabrica da Beer ed era uschè populara che – cura che la Beer & Cie è l’onn 1939 vegnida transfurmada en ina societad anonima – è naschida la Sullana SA. Ils onns 1930 fin 1950 fascheva Sullana reclama sco la cigaretta dad 1 franc la pli vendida da la Svizra. La pitschna fabrica al Silquai turitgais ha exportà en l’entir mund. Las «Cigarettes Orientales», cigarettas cun tubac oriental, duevan garantir per il meglier gust. La sorta Pérémochez, in tubac oriental cultivà en Svizra, furma er la differenza da gust caracteristica da la nova maschaida da tubac Sullana.

In’ultima perditga dal temp, ch’è l’onn 1950 entrà sco emprendist en la Sullana, sa regorda d’in schef da caracter, ch’era tar las collavuraturas ed ils collavuraturs tant temì per sias lunas sco er admirà per muments spontans da la beneficenza. A la cumpra d’in emprim vehichel plunader da manevrar a maun tras il figl Daniel da Feiwel Beer duai el avair reagì cun l’exclamaziun: «Nus n’essan betg qua a l’Escher Wyss!» ed empustaziuns sajan da far per posta e betg cun in telefon da quella giada char.

L’onn 1967 è SULLANA transferida a Wetzikon (ZH) ed ha tranter auter stgaffì in num sco fabrica, en las hallas da la quala pendevan ovras d’art contemporan cumpradas da giuvnas artistas e giuvens artists. Sur ils chaus da las collavuraturas ed dals collavuraturs han quellas obtegnì successivamain dapli valur.

La cultura da «l’art en la fabrica» è era vegnida stimada e tegnida da ses ultim directur ed ha gì sco consequenza ch’i vegniva realisà enstagl da canyoning e da bowling projects d’art cuminaivels cun il persunal. Da quest temp tutgava Sullana al concern Rothman NL, per il qual ella produciva en pitschnas ediziuns las marcas da cigarettas da luxus Peter Stuyvesant, Dunhill, Cartier e Vogue – Sullana era mo pli il num da la fabrica, ils ultims pachets da cigarettas Sullana èn svanids dal commerzi ils onns 1970.

Suenter la midada ha er Sullana scuvrì l’ost selvadi ed ha producì curt temp suenter la marca Fjodor da tubacs russ da Suchum. En il fratemp eran las atgnas marcas, sco Palette, Effendi e Club svanidas dapi daditg da las curunas.

Cura ch’il concern Rothman NL ha cumprà la Firma Burrus SA a Boncourt eri cler, ch’ils dis da la fabrica a Wetzikon eran quintads. Da quel temp na fimava daditg nagin pli cigarettas cun il num Sullana. La fabrica produciva enstagl las marcas da cigarettas da luxus dal concern Rothman. Perquai che sia spezialitad era da producir pitschnas ediziuns en moda spezialmain economica. Betg mo l’utilisaziun dal nov lieu da Sullana Wetzikon per pitschnas serias d’autras marcas aveva contribuì ch’il num Sullana era l’onn 1997, cura che la fabrica era vegnida serrada definitivamain, daditg istorgia.